03/03/2016 - Boltaí agus 'dumps'

Obair fíor-shuimiúil inniu.
Ag roinnt de na frámaí ní féidir boltaí a chuir isteach toisc go bhfuil siad ró-ghar le bolta eile, mar shampla, nó go bhfuil siad os cionn an seafta, agus araile. Sna cinn siúd ní mór dumps a chuir ann. Tá a dump cosúil le dual (pionna adhmad) nó treenail, ach déanta as cruach in ionad adhmad. Beagáinín cosúil le tairne mhór, is dóigh liom, ach gan ceann air.
Tosnaítear mar a chéile le boltáil,ghearrfar poll le druilire, ach ní théann an poll tríd an slí ar fad agus amach an taobh eile. Bíonn an poll beagáinín níos cúnga ná an pionna. Sa chás seo tá mo bhéalmhír ag 12.03mm ar leithead agus tá an barra cruach ag 12.30mm ar leithead. Oireann sé sin go maith leis an jab.

 Ag baint úsáid as an ndíreog arís chun a bhéalmhír a amharc ag dul isteach go díreach.

Agus an poll gearrtha, thomhaistear an doimhneacht agus ghearrtar an pionna go fad ní ba ghiorra ná sin.

 An pionna réidh le dhul isteach. Ansin buailtear an pionna isteach le casúir mór agus pritil.

Ansin líontar an cuid atá fágtha den poll le dallán.

Tá an pionna seo (19) ag dul isteach ag claon aisteach toisc go mbeidh an seafta ag dul faoi.

An scéal céanna ar u.20.

N'fheadar ar ghearr mé an poll ró-eadomhain, nó ar ghearr mé an pionna ró-fhada, ach beag nár theip orm an ceann seo a bhualadh isteach an slí ar fad. Mhínigh Liam go mbíonn aer sáinnithe ag bun an poll agus ní féidir an pionna a chuir isteach níos mó.

Agus ag an deiridh, u.2 atá in aice le bolta eile tríd an gcnaí tosaigh. Claontar an druilire chun tosaigh (agus an bhéalmhír chun deiridh) ionas nach mbeidh an dá poll in aice a chéile.

Roimh deiridh an poll a ghearradh, mhothaigh mé an bhéalmhír ag dul go taobh amháin. Mar sin stop mé agus chuireas pionna níos giorra ná a bhí in intinn agam isteach.

Bhaineas úsáid as bolta beag damáistithe mar phritil.

02/03/2016 - Ag bóltáil síos frámaí.

Agus mé ag tosnú ar maidin chonac go raibh roinnt boltaí fós ag bpointe ar an slí mícheart. Bhuel, b'in an chéad riar na hoibre mar sin :-)

Roimh

Iar

An tarna rud ná an bolta a ghearr John cúpla lá ó shin. Bhí tromluí agam aréir ag smaoineamh ar an mbolta sin ag meirgiú de réir a chéile taobh thiar den fráma sin. Dheinas dearúd aon phéint a chuir ar nuair a ghearrfar é.
Mar sin thógas an fráma amach agus chuireas spota beag 'cold galv spray' air. N'fheadar an déanfaidh sé aon difríocht i ndáiríre, ach ar a laghad beidh codladh agam anocht.

An triú jab ná na deilbh go léir a chuir i dtaisce arís. Ní chreidim é ach tá an frámáil críochnaithe anois, beag nó mór.

Agus ansin go fíor obair an lae - boltáil síos na frámaí eile.
An uair deireanach bhaineas úsáid as mo dhruilire saor féin as Lidl chun na poill a ghearradh, ach ceapaim go bhfuil an crágán de, sórt neamhchothrom agus bhí sé ag gearradh na poill ró-leathan. An uair seo d'úsáid mé druilire Liam agus bhí na boltaí i bhfad ní ba chúinge ag dul isteach iontu.
Bhí orm díreog nua a dhéanamh suas, ach bhíos ró-mífhoighneach le fanacht i gcomhar duine chun an bhéalmhír tharathair a amharc agus mé ag druileáil.

D'éirigh liom ceart go leor leis an gcéad cheann. Beagnach sa lár go foirfe.

Deas.

An bolta tríd agus an cnó fáiscthe.

D'úsáid mé an córas céanna leis an dtarna cheann, ach chuas ar strae caoi éigin. Chuas go Liam chun comhairle a fháil uaidh agus mhol sé dom leath ceann an bolta a ghearradh de agus é a bhádh i bpoll sa chíle leis an gcruth céanna. Rud a rinne mé.

Spota beag galv-spray ar an gceann gearrtha.

D'oibrigh sé, ach b'fhearr liom gan é a dhéanamh arís.

Ní raibh spás fágtha i gcomhar dallán, mar sin líonas an bearna le Sikaflex. Tá súil agam go mbeadh sé ceart go leor.

01/03/2016 - Na boltaí tosaigh.

Bhí cúpla rud suimiúil le déanamh inniu.
Nuair a bholtáil John na frámaí le chéile, chuir sé roinnt acu isteach ó aghaidh go cúl agus roinnt eile ó cúl go haghaidh. Bhí a fhios agam go mbeadh mé ag féachaint ortha go deo na ndeor gan a bheith comhionann, agus chuirfeadh sé as go mór dom! 
Mar sin chuireas teanntráin agus tacaí ar na frámaí i gceist, d'oscail mé na cnónna agus bhualas na boltaí amach. Nuair a chuireas na boltaí isteach arís droim ar ais, agus ceapaim ná fuil aon dochar déanta.

Roinnt acu caoi amháin, roinnt caoi eile. >_<

Go léir mar a chéile ag an deiridh. Bhuel, na cinn ag an mbarr ar aon nós. Beidh na cinn ag an mbun as radharc nuair a bheidh an bád feistithe amach ar fad.

An tarna jab inniu ná fráma a dó a bholtáil síos agus le chéile.
Bhí ceann de na boltaí ag dul tríd an cíle agus an cnaí tosaigh díreach in san áit i gcomhar fráma a dó. Sin fadhb. Bhí orainn an bolta sin a thógaint amach ach fós bhí fadhb an. Chuaigh an bolta sin isteach ag uilleann éagsúil, sé sin le rá nach raibh sé ceartingearach. Ach ní foláir don bolta i gcomhar an fráma bheith díreach ceartingearach. An réiteach? Ghearr Liam poll ceartingearach in urlár u. a dó agus mhol sé dom an bolta nua a chuir isteach sa sean-pholl agus ansin é a chamadh siar go mbeadh sé ceartingearach ón cíle suas. Ansin chuirfimis an urlár thar an bolta.

   
An bolta nua ag dul isteach, claonta ar aghaidh, agus ansin barra iarrainn le húsáid mar luamhán chun é a chamadh suas ceartingearach.

An urlár boltáilte síos go scaoilte ar dtús, ansin bhí na frámaí boltáilte leis, agus ansin d'fháscadh an cnó ar an mbolta mór (tríd an urlár agus an cíle). D'oibrigh sé go galánta!