13/02/2017 - Deiridh an saoire seo.

Bhuel. Na dingeacha bainte de, seo mo shéamaí anois.
N'fheadar conas a bheidís ag an deiridh. Tá an-chuid greanáil le déanamh agam orthu fós. Bhí an méid go léir chomh inseachanta, bím chomh feargach nuair a smaoiním air.
Ach ní réiteoidh mo chuid fearg aon rud. Caithfead leanúint ar aghaidh le dóchas go mbeidh gach rud ceart go leor ag an ndeiridh.

Ní rabhas ach díreach tar éis na séamaí a iniúchadh nuair a bhuail mo ghuthán. Josh Mortimer a bhí ann agus bhí sé réidh maide Dhúghlais a ghearradh dom.
Bhí fear (darbh ainm Will) tagtha go dtí clós Josh le muileann sábhadóireachta iniompartha.

Agus seo d'fhuaireas as an maide sin. Seacht gclár atá beagáinín caol agus roinnt maith cranraí iontu. Níl siad foirfe, ach tá súil agam go bhful mo dhóthain adhmad agam anois an plancáil a chríochnú.

Tá súil agam freisin go thriomóidís go tapaigh os chomhar an tí, fén ghrian agus sa ghaoth.

Ar ais ag an clós, thug an banríon cuairt orm chun a faomhadh nó a diúltú a thabhairt.

Ina dhiaidh sin bhí obair fós le déanamh. Thosnaíos an puinseáil a dhéanamh ar na tairní sna rungáis.
Bhí orm an tairne seo a athrú toisc gur tháinig sé amach arís nuair a bhualas an tairne eile atá ina aghaidh isteach ón taobh amuigh.
Dheineas pionna adhmad darach le bualadh isteach sa pholl a bhí fágtha agus chuireas tairne eile isteach in aice leis.

Ansin d'iarr mé an bearna sin a líonadh le slisín adhmad, agus eapocsach dar ndóigh!

Agus sin é. Críochnaithe arís le haghaidh ceithre sheachtain. Bead ar ais ag obair amárach.
Bhíos ag súil go mbeadh i bhfad níos mó dul chun cinn agam an saoire seo. Ní raibh aon cúrsaí oiliúna nó turais go Baile Átha Cliath nó aon rud mar sin. Bhí an bád mar post lán aimseartha agam, ach fós ní raibh ach 18 agam ina iomlán. Ní bíonn ach 26 lá sa saoire. Tagaim abhaile ar an gCéadaoin. Téim go dtí an clós an Déardaoin agus an Aoine sin. Sin dhá lá. Ansin bíonn trí sheachtain lán agam, sin 15 lá. Agus ansin sa seachtain deireanach téim go dtí an clós ar an Luan agus imím ar an Mairt. Sin é, 18 lá ina iomlán.
Bhí súil agam go mbeadh an bhád réidh le dhul ar an uisce sa samhraidh seo (le inneall ach gan an rigín agus seolta agus araile), ach ag féachaint ar aghaidh anois, níos lú ná 40 lá oibre fágtha agam roimh an tsamhraidh. Tá an-chuid le déanamh agam roimhe sin. Tá 10 stráca le déanamh. Tógann gach ceann nach mór dhá lá. Ansin iad a chorcáil. Greanadh, lasmuigh agus laistigh. An uchtán, na cnaíocha, an post deiridh, tochtaí, urláir, gan focal a rá fén gcóifrín sa thosach. Péinteáil.
In ainneoin mo dhóchas, tá an cuma ar an scéal ag an bpointe seo nach mbeidh an bád seo ag dul áit ar bith sa samhraidh seo.

10/02/2017 - Eapocsach agus puití.

Seo é mo iarracht am a chasadh siar agus mo bhotúin a leigheas.

Chuireas eapocsach ar na scoilteanna chomh fada agus ab fhéidir liom agus ansin bhualas dingeacha isteach fén rungás ag iarraidh na bearnaí a dhúnadh.
Bhí baol ann freisin go phléascfainn an rungás nó b'fhéidir na strácaí amach, ach ar a laghad níor tharla sé sin.

Níl lé déanamh anois agam ach fanacht leis eapocsach a chruaigh, agus chífad ansin conas ar éirigh liom.

Agus mé ag fanacht, leanas ar aghaidh leis an puití luaidhe dhearg a chuir isteach sna séamaí.
Is ea triplumbic tetroxide é luaidhe dhearg (Pb₃O₄). Is féidir é a cheannach mar phúdar agus ansin é a mheascadh suas le gnáth puití ola rois chun an puití speisialta seo a dhéanamh, ach cheannaíos féin é ullmhaithe cheanna féin.

Tá an stuif nimhneach seo ina úsáid i longa agus báid leis na cianta. Ní mór dom a bheith cúramach gan é a leogaint isteach i mo bhéal nó mo shúile nó mar sin. Ag an am céanna caithfidh mé an méid is mó a chuir isteach sna séamaí agus is féidir liom.
Déarfainn go mbeadh sé ní ba éasca muna raibh an aimsir chomh fuar.

Bhí an t-ádh orm gur thug Fachtna cuairt orm nuair a bhíos ag tosnú. Chonaic sé go díreach go raibh mé ag déanamh go mícheart é. Bhí orm i bhfad ní ba mhó a chuir ann agus ní ba mhó a fhágáil ar an ndromchla. Chomh maith le sin do bhí an uirlis mícheart agam. Ba choir dom scian puití a úsáid, ach ní raibh ach scríobaire agam.

Agus féach cad a tharla leis. Bríste ina dhá leath. Ba mhaith an rud é go rabhas ábalta sean-scríobaire a aimsiú sa chlós chun an obair a chríochnú.

Agus seo mar a bhí sí ag deiridh an lae.

09/02/2017 - Corcáil agus rian láimhe an bhreall anásta (mise dar ndóigh!).

Leanas ar aghaidh leis an séama clébhoird deireanach inniu.

Ab abú! Taobh amháin críochnaithe.

Thugas fé deara ansin go raibh dromchla an cabhail mí-cothrom ina dhiaidh an corcála.
Níorbh fholáir dom beagáinín plánáil a dhéanamh arís.

.

Bhí gach rud ag dul chun cinn mar ab gnách nuair a tháinig Liam chun an obair a iniúchadh. Tar éis sracfhéachaint d'fhógair sé go gcaithfidh mé an cadás a bhualadh isteach níos mó in áiteanna.
Sin a dúirt sé ach ní shin a chualag istigh i mo cheann.
Istigh i mo cheann ghlacas go gcaithfidh mé a méid go léir a bhualadh isteach níos mó agus níos láidre.
Thógas amach iarann cruála. Tá seo cosúil leis an gnáth iarann cácála ach tá eang ag an mbun agus is féidir an cheann seo a bhualadh i bhfad níos láidre.
Bhí sé deacair, agus thóg sé an-chuid iarracht, ach bhualas an cadás sin isteach sna ceithre shéama ní ba dhoimhne ná a bhí.
Ach cad a bhí ag fanacht liom nuair a bhíos críochnaithe agus d'fhéach isteach sa bhád?
Bhuel tada, seachas gach séama pléasctha isteach. Scealpa i ngach áit. Cadás ag gobadh tríd. Mo shéamaí álainne scriosta. Mo chuid oibre curtha amú.
Bhíos trí chéile ag féachaint orthu ag an am agus táim tinn ag smaoineamh orthu anois.
Cén sórt dúramán atá ionam? Breall lámh láidir anásta, sin an sórt.

Chuas go dtí Liam chun a chomhairle a fháil. Threoraigh sé a lán dingeacha a fháil/déanamh agus iad a úsáid le bataí agus an rungás chun na scealpa a ghliúáil isteach.

Agus muid ag caint, thosnaíomar ag plé an inneall agus an feadán seafta agus araile. Do thaispeáin Liam catalóg dom ag lónadóir i Sasana a soláthraíonn iad, agus mhol sé baill áirithe freisin.

Agus mé in ísle brí, leanas ar aghaidh leis an t-aon rud a bhíos ábalta a dhéanamh, agus níorbh shin ach ligh beag prímeálach a chuir ar na séamaí.