10/04/2017 - Gal fé dheiridh

Ar bhfaca tú riamh an scannán Clerks? Bíonn an príomh charachtar i gcónaí ag rá "I'm not even supposed to be here today!". Bhuel, bhí sé cosúil leis sin liomsa inniu.
Tá ná páistí abhaile ón scoil agus táimse am imeacht ag obair arís amárach. Ba cóir 'is ba cheart dom a bheith sa bhaile leothu siúd ar an lá seo, ach níorbh féidir liom an stráca íochtair sin a fhágáil nach mór déanta agus mé ag imeacht amárach.
Ar dtús ghearras suas roinnt gearrthóga agus ansin chuas ag scroblachóireacht mór thimpeall an clós ag lorg conamar adhmaid. I ndáiríre, chaitheas an chuid ba mhó den lá ag déanamh é sin.

Agus mé ag déanamh é sin bhí an pota gaile á líne le uisce as píobán gairdín. Nuair a bhí sé lán las mé tine ag a mbun.

Thóg sé an-chuid ama an méid uisce sin a bheiriú, ach ag an deiridh bhí gal ag teacht amach agus isteach leis an bplanc.

Clúdach thar an béal.

Agus é sin á ghalú, thaispeáin Liam dom conas na lumberholes a ghearradh.

Ag teacht ar dhá uair a chloig thógamar an planc amach agus ritheamar síos go dtí an bothán. Thar a bheith faichilleach, chuireamar (Liam den chuid ba mhó) isteach é agus chasamar é mar a bhí ag teastáil.
D'úsáid Liam cúpla cleas nach raibh ar eolas agam leis na crampaí agus maidí adhmad agus dingeacha chun an clár a fháisc isteach i gceart.

Níl sé feistithe go foirfe, agus tá cuid maith obair fós le déanamh ann, ach fágfaimid mar sin é go tiocfaidh mé abhaile i gceann ceithre sheachtain.

Gan a bheith sásta leis an méid dul chun cinn sin, chaitheamar an píosa eile isteach freisin. Bhí a fhios agam go raibh an-chuid obair le déanamh fós air, ach bhí sceitimíní orm anois!

Uair a chloig go leith an ceann seo.

Agus hup, tá sé ann. Ró-thiubh, gan a bheith feistithe i gceart, ach beidh sé breá socair ann go dtí mí Bealtaine!

07/04/2017 - Frustrachas leis an stráca íochtair.

An chéad rud ar maidin ná gur tháinig Liam isteach chun cabhrú liom an stráca íochtair a ofráil suas le fáil amach an raibh nó nach raibh sé ceart.

Do bhí orainn a bheith rí-churamach leis, ionas nach mbrisfimid é trí thimpiste. Bhíos féin ag an gcríoch dúr den bplanc agus ní rabhamar ábalta é a chuir isteach i bhfad, ach bhí sé soiléir do Liam go raibh rud éigin mí-cheart.

Chonaic sé go raibh cruth mí-cheart in áiteanna ach níba mheasa ná sin, chuireas an beibheal ar an bplanc droim ar ais.
Mhol sé an deilbh a chuir suas arís, aon míchruinneas a dheisiú, bun an stráice a ghearradh arís agus na beibhil a dhéanamh i gceart.

Ag sheasadh siar tá cuma maith go leor uirthi, ach le mion-iniúchadh tá bearnaí le feiscint. Caithfidh sé a bheith foirfe, dar le Liam.

Tar éis roinnt deisiúcháin ar an deilbh, mharcáil mé an stráca arís agus bhaineas leadhb de leis an sábh ciorclach agus an preabshábh.

Ach thugas fé deara go tapaigh nuair a thosnaíos ag cuir an beibheal air gur ghearras ró-ghar leis an líne leis an bpreabshábh. Níorbh fhéidir liom an beibhil a dhéanamh i gceart ag an bpointe gan dul thar an líne. Bhíos i bponc. Téigh thar an líne (a chuireas ann chomh cúramach sin) nó cuir an beibheal mícheart ann. Ag an deiridh dheineas comhghéilleadh agus rinne mé an dá rud!

Ina dhiaidh sin, go mall, faichilleach, chomh fada agus ab fhéidir liom, chuireas an planc suas chuig an rabóid ag iarraidh fáil amach conas a bhí ag éirí liom.

Tá sé deacair a bheith cinnte, ach níl an chuma ró-mhaith ar an scéal. Gheobhfad amach amárach é, ar dhóigh amháin nó ar dhóigh eile.

06/04/2017 - Dul chun cinn.

Tar éis an lá uafásach inné, bhíos ag súil go mbeadh cúrsaí níos fearr inniu, agus bhí.

An chéad rud lé déanamh ná an chéad píosa tosaigh den stráca a chríochnú. Bhíos ag séitéaracht beagáinín ag baint úsáid as seac le cabhrú liom an planc a fháscadh suas ina áit ceart. Ní raibh Liam ró thógtha leis ach cén dochar aicearra a ghearradh ó am go chéile?

Bhí eagla orm an clár a thógaint anuas chun an bun a ghearradh, dá bhrí sin ghearras ina áit é. Ar dtús leis an sábh tionúir, agus an méid deireanach le siséal.

Ansin leagas aníos an tarna chuid den stráca agus mharcáil mé an bun air.

Agus an beibheal.

Ag dul isteach ina áit go deas.

Le beagán cabhair ón seac.

Ceart go leor.

Bhí an tríú phíosa sórt casta. Níorbh mór de a bheith cuasach ar dtús, cothrom sa lár agus dronnach ag an deiridh.

Agus mé ag obair ar sin, tháinig Liam isteach ag seiceáil suas orm. Thapaíos an deis mo riachtanais le haghaidh adhmad a phlé leis.
Ní rabhas ábalta fós adhmad oiriúnach a aimsiú i gcomhar an crann. Is féidir crann a leagant i gCill Airne ach bheadh sé thar a bheith costasach é a iompair go dtí an Sciobairín.
Mhol Liam go mbeadh crann lannach mar rogha i bhfad níos saoire. B'fhéidir liom ceithre chlár déil dhearg, 16 troigh fé 6 orlach fé 3 orlach, a cheannach go háitiúil agus iad a ghliúáil le chéile le eapocsach agus an crann a dhéanamh as an toradh.

Agus maidir le maidí rámha, mhol sé bataí 3 orlach fé 3 orlach nó 3.5 fé 3.5 a fháil. Bheadh an lonna chomh tiubh sin agus bheadh an bos chomh leathan leis an tomhas trasnánach. Dar le mo shean-chara Pythagoras, an ciall atá leis sin ná:

x² + y² = z²
3² + 3² = 18
z = 4.24".
I mo thuaraim féin bheadh an bos sin ró-chaol.

3.5² + 3.5² = 24.5
z = 4.95".

Beagnach ann, ach ní bheadh aon ábhar breise chun mé fhéin a shábháil i ndiaidh mo ghnáth botúin. Ach...

3.625² + 3.625² = 26.28
z = 5.13".

Beidh sé sin maith go leor ceapaim.
Ach nílim cinnte cé chomh fada go mbeidís. Caithfidh mé smaoineamh ar sin.

Tar éis an cur isteach sin leanas ar aghaidh ag críochnú an stráca seo.

Ní raibh an spiling ró-dhona, ach bhí beagán obair fós le déanamh.

Réidh le tairneáil.

Déanta.

Níl sé chomh soiléir as na fótagraif seo, ach mar gheall ar an méid feistiú a bhí lé déanamh ar lár an stráice seo, tá cruth an-aisteach air. Tá sé ró-chaol i lár an bháid agus dá bhrí sin caithfidh an chéad ceann síos eile bheith níos leithne ná is gnáthach san áit sin. Beidh an stráca sin sách leathan pé scéal é, agus is é an "shutter plank" é chomh maith. Tá súil agam nach mbeidh sé ró-leathan ar fad ar fad.