20/11/2017 - Ag imeacht gan coinne.

Mo léan géar! Fuaireas roimh-phoist go déanach aréir, ní mór dom imeacht ar ais ag obair inniu. Níl an t-am agam na leabaí a phionnáil isteach, níl an t-am agam an innill a chuir suas. Níl ach uair a chloig amháin agam mo uirlisí a ghlanadh suas agus cúpla fhótagraif a ghlacadh.
Tá díomá an domhain orm, ach ní íocfaidh an bád seo as féin!

Sin sin anois go dtí deiridh mí na Nollaig.

16/11/2017 - Leath lá leis na leabaí

An dealbh réidh, leanas ar aghaidh ag ullmhú an bloc darach.
Ag féachaint siar anois, agus ag féachaint ar an fótagraif thíos, tá mearbhall agus ionadh orm nár thugas an séama lobh ag rith tríd an bpíosa adhmad seo. Beidh sé sin tábhachtach ar ball, ach nílim cinnte fós cé chomh tábhachtach is go mbeidh sé.
Bheadh sé an-simplí an séama sin a sheachaint, cas an bloc thart - sin an méid, ach níor chonac é, agus leanas ar aghaidh, ag treabhadh liom go sásta.

Sách cothrom anois, tharrac mé an patrún amach.

Agus ghearras amach é.

Agus arís an-chuid ama ag feistiú ina dhiaidh sin.

AN uair seo chinneas an cothromú a dhéanamh ag an deiridh.

Um an dtaca seo thugas fé deara go raibh an séama caol lobh i lár an píosa adhmad tar éis oscailt go leathan. Chuireas cóta prímeálach tiubh orthu araon, agus tá súil agam go cuirfidh sin deiridh leis an bhfabht seo, ach is eagal liom go bhfuil fadhbanna i ndán dom leis.

Agus b'in é. Beimid ag dul go Corcaigh amárach ag déanamh siopadóireacht Nollaig, ach táim ag súil lena chríochnú ar an Luan agus an innill a chuir suas orthu.

15/11/2017 - Na leabaí innill.

Beagáinín obair ar an dealbh ar maidin, agus bhíos réidh le tosnú ar an gcéad leaba.

Ní raibh ach píosa amháin fágtha agam den dair 4" ar tiús. Tá sé breá stálaithe fén am seo, agus cruaidh go leor, ach tá muinín agam nach mbeidh aon fhadhbanna agam le bogadh ná scoilteanna anois.
An chéad rud ná clár a dhéanamh de thaobh amháin.

Agus ansin tríd a tiúsóir leis.

Agus ansin patrún an dealbh a mharcáil amach air agus gearradh amach.

Ansin, bhí orm an barr a dhéanamh breá cothrom leis an locar.

Agus ansin thosnaigh an feistiú.

Chaitheas breis is dhá uair a chloig ag cnagadh leis an siséal, ach ag an deiridh shuigh sé síos isteach ina áit i gceart.

Gan aon phíosa dair sách tiubh an tarna leaba a dhéanamh, d'aimsigh Liam píosa sa chlós áit éigin agus thug sé píosa de dom.

Ach mhol sé dealbh eile a dhéanamh le haghaidh an taobh clébhoird, agus bhí an ceart aige - ní luífeadh an chéad dealbh isteach san áit san i gceart.

14/11/2017 - Cóiriú an trasnán agus ag ullmhú le haghaidh na leabaí innill

Ar ais ag an gclos go moch ar maidin agus cíocras orm fail amach conas a bhí an post.
Do bhí an Sikaflex cruaite ceart go leor agus anois bhíos ábalta roinnt bearradh a dhéanamh agus caoi a chuir ar na boltaí 'is na cnónna.

Anseo táim ag déanamh spás i gcomhar an leicneán go luífidh sé cothrom leis an adhmad.

Agus mé ag gearradh inné, bhraitheas rud éígint agus mé ag dul thar an bpost istigh, agus féach, scriú eile folaithe ann!

Ag plánáil síos go dtí an líne, fé mar is gnáthach.

Agus anois, seo mé ag déanamh praiseach den trasnán.

Praiseach ceart.

Ach le roinnt comhairle ó Liam, bhíos ábalta an cás a shábháil, mar an chuid is mó.

Féach...bád!

Ansin thosnaíos ar jab tábhachtach eile, na leabaí innill.
An chéad rud ná líne teann a shíneadh go díreach tríd lár an feadán chun treoshuíomh agus ailíniú ceart an innill a fháil.

Dhein Liam roinnt tomhais ar an innill féin, agus ansin ar an mbád, agus ansin ar an líne agus an feadán; agus d'ordaigh sé dom dhá dhronuilleog a dhéanamh as clár-adhmad. Ceann amháin 6 orlach fá 12 orlach agus ceann eile 8 orlach fá 12 orlach.
Bhí orthu a bheith cearnach, díreach agus láraithe ar an tsreang.

Bhí orthu bheith greamaithe leis na frámaí go foirfe cothrománach.

Sin déanta, bhíos ábalta ruaig a chuir ar an tsreang.

Agus ansin thosnaíos ag déanamh dealbh le haghaidh na leabaí.

13/11/2017 - An post deiridh istigh

Ba mhaith an rud é nár shuiteáil mé an post inné, nuair a d'fhéach Liam air ní raibh sé sásta leis ar scor ar bith. Cruth mí-cheart nó gan a bheith cearnach, nó rud éigin eile. Nílim cinnte. Is cuma, threoraigh sé dom cuid maith ábhair a bhaint ó thaobh amháin agus triail arís as.

Níl mé féin cinnte, ach bhí seisean sách sásta leis anois.

Agus mé ag fanacht leis, chaitheas roinnt ama ag greanáil laistigh.

Nuair a tháinig Liam ar ais, chinneamair go mbeadh sé níos fearr an trasnán a ghearradh roimh an post a shuiteáil.

Ansin thugas fé deara go raibh rud éigin mí-chruthach nó éagothrom leis na línte lagbhoird.
Má chuireas líne díreach idir an ngunail clébhoird agus an ghunail deasbhoird, ní bheadh an líne cearnach le líne an post.
Má chuireas líne trasna an trasnán, cearnach leis an bpost, bheadh sé os cionn an ghunail clébhoird agus laistíos den ghunail dheasbhoird.

Tar éis féachaint air tamall, i gcaíonna éagsúla, chinneas é a dhéanamh cearnach leis an bpost. Beinn ábalta rud a dhéanamh leis ar ball chun snas ceart a chuir air.

Gearr tapaigh amháin leis an sábh ciorclach (le beibheal ann) agus b'in é.

Tá súil agam go mbeidh an cuma ceart air ag an deiridh.

Ansin bhíos ábalta an post a shuiteáil, ach bhí sé ag éirí déanach agus bhíos fé bhrú ama.

Ar dtús chuireas an Sikaflex ar an bpost agus ansin shleamhnaigh mé an post isteach san alt (chuaigh sé isteach go héasca an uair seo leis an Sikaflex mar bhealadh).

Crampa amháin ag an mbarr agus bhíos réidh leis na poill a tharathraigh agus na boltaí a chuir ann. Bhí orm na boltaí a fháscadh go teann sara chruaigh an Sikaflex. 

Bhí sé an-deacair liom an poll is faide a tholladh le mo dhruilire bataire, ach fén am sin bhí an clós dúnta agus ní raibh ceann eile ar fáil.

Bhíos fíor fé bhrú anois agus mé ag ceapadh go mbrisfinn mo dhruilire agus gan a bheith ábalta ná poill a ghearradh agus na boltaí a chuir.
Tar éis an-iarracht agus roinnt dul chun cinn, stop an druilire go tobann agus tar éis tamall thugas fé deara nach raibh an tarathar (béalmhír) ag teach amach in san áit a rabhas ag súil! Bhí sé tar éis dul tríd an bpost amuigh, tríd an dtrasnán, tríd an bpost istigh agus anois bhí sé ag iarraidh dul tríd fráma a fiche!

Ní dóigh liom go raibh sé ábalta dul ar aghaidh níos mó, ach níor dhein sé aon difríocht, ní bheadh mo bholta is faide sách fada dul an slí sin ar fad. Ba mhaith an rud é gur thógas an bara cruach chuig an clós ar maidin agus bhíos ábalta dump a dhéanamh go tapaigh.

B'fhearr liom bolta a úsáid, déarfainn go mbeinn ábalta é a fháscadh níos daingne ná an dump, nó pionna cruach.
Ach ag deiridh an saol, pionna fada a bhí ann agus thóg sé an-iarracht é a bhualadh isteach. Ag an deiridh bhí ceann cosúil le tairne air agus ceapaim go bhfuil sé ag déanamh jab maith an post a choinneáil ann.

Tá dhá bholta eile ann freisin. Tá siad níos giorra agus ní raibh am méid dráma céanna bainte leo ag dul isteach.